विराटनगर । विराटनगरको गोल्डेन अस्पताल आज देखि आफ्नै भवनमा सञ्चालनमा आएको छ ।
विराटनगर–११ जनपथ टोलमा २२ कठ्ठा जग्गामा रु ४८ करोड करोडको लागतमा नव निर्मित एक सय शैयाको अस्पताल भवनको कोशी प्रदेश मुख्यमन्त्री हिक्मतकुमार कार्कीले उद्घाटन गर्नुभयो ।
अस्पतालको उद्घाटन गर्दै मुख्यमन्त्री कार्कीले सामान्य जनताको पहुँचमा स्वास्थ्य सेवा पुर्याउने प्रतिवद्धता व्यक्त्त गर्नु भएको छ । उहाँले प्रदेशको आर्थिक प्रगति एवं रुपान्तरण गरी गरीविका रेखामुनिका रहेका जनतालाई स्तरीय स्वास्थ्य सेवा उपलव्ध गराउने बताउनु भयो ।
मुख्यमन्त्री कार्कीले नेपालको स्वास्थ्य क्षेत्रमा पहिलो स्थान राख्ने शहर विराटनगर भएको बताउँदै यो शहर स्वास्थ्य सेवा उपचारको क्षेत्रमा केन्द्रको रुपमा स्थापित हुनका साथै जनताले गुणस्तरीय सेवा पाइरहेको विचार राख्नु भयो । उहाँले भन्नु भयो ‘ प्रदेश सरकार मापदण्डको परिधि भित्र रहने स्वास्थ्य संस्था एवं अस्पताल सञ्चालनको अनुमति प्रदान एवं अनुगमन गर्दै जाने छ ।’
मुख्यमन्त्री कार्कीले यस क्षेत्रबाट उत्पादन भएका चिकित्सकहरुले विदेशको मोह त्याग गरि स्वदेशमा जनताका सेवा गरिनु भएका गोल्डेन अस्पतालका श्याम रौनियार लगायत अन्य चिकित्सकप्रति आभार व्यक्त्त गर्नु भयो ।
प्रदेशको शिक्षा, कृषि, उद्योग, स्वास्थ्य, पर्यटन र सामाजिक क्षेत्रलाई आर्थिक निर्माण, रोजगार र देश विकासको आधारशिला बनाएर नेपालको विकास समृद्धिको यात्रा कोशीबाट हुने स्थापित गर्न हामीसबै जुट भई काममा लाग्न आग्रह समेत गर्नु भयो ।
गोल्डेन अस्पतालका प्रबन्ध निर्देशक एवं बरिष्ठ फिजिसियन डा. श्यामकुमार रौनियारले अबको केही समयपछि अस्पताल चौक र महेन्द्र चौकको नयाँ भवन गरी दुवै ठाउँबाट बिरामीलाई सेवा प्रवाह गर्ने बताए । केही दिन पछि अस्पताल चौकमा सञ्चालित अस्पताललाई बन्द गरेर महेन्द्र चौक पश्चिम रहेको नयाँ अस्पताल भवनबाट बिरामीलाई उपचार सेवा प्रदान गर्ने बताए ।
गोल्डेन अस्पतालका बोर्ड अफ डाइरेक्टर सनातन मण्डलले ३५ भन्दा बढि विशेषज्ञ डाक्टर कार्यरत रहेको गोल्डेन अस्पतालमा सबै रोगको उपचार सेवा उपलब्ध रहेको बताए । विस २०६८ साल देखि बहालको घरमा १५ बेडको ओपीडी सेवाबाट सञ्चालनमा आएको गोल्डेन अस्पतालले नयाँ भवनमा अस्पताल सञ्चालनमा ल्याउँदा १ सय बेडको मान्यता प्राप्त गरेका छन् । र महेन्द्र चौकको नयाँ भवनको अस्पतालबाट निम्न आयस्तर भएका बिरामीदेखि हुने खाने बिरामीहरूको एकै थलोबाट
अत्याधुनिक प्रविधिमार्फत उपचार सेवा प्रवाह हुने मण्डलले बताए ।
अस्पतालका अध्यक्ष गुलावचन्द्र रौनियार, निर्देशक श्याम रौनियार,सञ्चालक सनातन मण्डल, पूर्वमन्त्री शिवकुमार मण्डल,प्रदेशका पूर्व मन्त्रीहरु जीवन घिमिरे , जयराम यादव, वडा न ११ अध्यक्ष तीर्थेन्द्र न्यौपाने र नेकांका हसन अन्सारीले शिक्षा र स्वास्थ्य क्षेत्रमा केन्दको रुपमा रहेको यस क्षेत्रमा गरीव जनतालाई सहज र गुणस्तरीय स्वास्थ्य सेवा उपलव्ध गराउनु पर्नेमा जोड दिनु भयो ।
सबै राष्ट्रिय राजनैतिक दलका प्रतिनिधि, स्थानीय तहका प्रमुख उपप्रमुख र विभिन्न स्वास्थ्य संस्थाका सञ्चालकहरू गोल्डेन अस्पतालको उद्घाटन समारोहमा सहभागि भएका थिए ।
प्रकाशित मिति: २०२४-०८-११ , समय : २०:३२:१७ , २ महिना अगाडि